Heilig Abend Es fliegelet und schneibelet, es goht a käla Wind, do saget die fünf Hennala: 'Heit kut no`s heilig Kind.' D`r Goggl kräht und luagat, wo seine Weiber sind. 'Höret mit dem Scherra auf, gand nei beim Henneloh ganz gschwind'. Drei Gäns, die schnattret volla Glück, mit Grausa denked se an die letschte Täg z`rück. So viele hand ihr Leaba lau, die wared dick und fett. Eis Magre dund se b`halte, des findet mir sooo nett. Balbi liegt scho im Backrohr dinn, do isch bestimmt recht heiss. Mir feiret des Weinächte besonders wild, denn was nächscht`s Joahr isch, wer weiss? D`r Katzeboale, der Laggl, flacket seid am Morga am Kachelofa da, dass er`s heit ja it versäumt, wenn z`Mittag kommet die Broatwüscht dra. Im Dachbode, do danzet d`Mäus, die hand Speck und Käs g`schtohle, in d`r Speis. 'Weg`s deam Boale brauch mer numma schaue, der muaß erscht seine Wüscht verdaue'! D`Saua schmatzget am Fuatertrog, Grunzi seid: 'I hett a Frog, wenn`s Christkind kut heit bei d`r Nacht, wiad eis a exschtra Portion Kartoffla broacht?' Im Geißestall goat`s reacht zua, do wird zickt und boxt grad gnua. 'Mir schlofed heit it, in der heilig Nacht, es wird g`juckt und g`lagglet, dass Bude kracht!' Wie wild bellt d`r Hund ums Haus, der faul Boale leabt wieder in Saus und Braus! I weiß g`wies, des lost sich it verhindra, deam wer i no d`Freasshafe plündre. Recht riebig isch im Kuhstall dinn, d`Kälbla schloafed und hand koi Dummheit im Sinn. D`Lina und D`Alma nollet an dem Hei no rum, 'Zita schieb eis au a Aufsoat her, it´s kumm!' D`r Ochs seid zum Esel. 'Stand auf, mir sottet in Krippestall gau, denn heit Nacht kennet mir Maria und Josef it alloi lau. Auserwählt sind nur 'mir zwei', sonscht isch niemand bei Christi Geburt dabei. Was isch blos mit deana Schäfla los, warum rennet die im Kreis und freasset weder Gräs no Moos? Wie spät isch denn, isch`s Kind scho do? 'Los mir laufed weile zur Krippe na! Alle Viecher wissed über des 'B`sondre' heit Bscheid! Liebe Leit, seid auch ihr für`s Jesukind bereit?
Allgäu